مسار متنزه الاسوار الشمالي

المسار بيبدأ من باب الخليل، واحد من أهم أبواب البلدة القديمة، وبيكمل فوق الأسوار الشمالية لحد باب الجديد وباب الزاهرة، وأحيانًا بيوصل لحد باب الأسباط. وأنت ماشي فوق الأسوار، رح تشوف مشاهد بانورامية رهيبة للمدينة. على يمينك رح تشوف القدس الغربية، المباني الحديثة، والأسواق، وعلى يسارك رح تكتشف أحياء البلدة القديمة بتفاصيلها الصغيرة، الأزقة الضيقة، والقناطر الحجرية.

واحد من أهم الأماكن اللي رح تمر فيها هو برج اللقلق، اللي بيمنحك منظر بيوصل لحد قبة الصخرة والمسجد الأقصى. كمان رح تمر فوق أحياء القدس المختلفة، مثل حي النصارى اللي فيه كنائس وأديرة قديمة، وحي المسلمين اللي بتشوف فيه البيوت والأسواق العريقة من فوق. كمان المسار بيقودك لحد باب الزاهرة، واحد من المداخل الشرقية للمدينة، واللي بيقربك من أهم المعالم الدينية هناك.

قبل ما تروح، لازم تعرف إنه المسار فيه درج وأماكن غير ممهدة، فالأفضل تلبس حذاء مريح، ويفضل كمان تجيب مياه معك خصوصًا بالصيف لأنه المكان مش كله ظل. إذا عندك رهبة من الأماكن العالية، يمكن تحس ببعض التوتر، لكنه مكان آمن وعليه حواجز حديدية. المسار مناسب للعائلات، لكنه مش الأفضل للأطفال الصغار أو لكبار السن اللي عندهم صعوبة بالحركة

كيف توصل للمكان؟

• بالسيارة: إذا معك سيارة، ممكن تصفها في موقف "ماميلا" والي اسمه חניון קרתא, بالقرب من باب الخليل، أو تدور على مصفات اخرى جنب باب الجديد.
• بالمواصلات العامة: معظم الباصات اللي بتوصل للبلدة القديمة بتنزل عند باب العامود أو باب الخليل، ومن هناك بتمشي شوي لباب الخليل.
• بالقطار الخفيف: أقرب محطة هي محطة باب العامود، وبعدها بتمشي تقريبًا 10-15 دقيقة باتجاه باب الخليل.

شباك التذاكر موجود اول ما تفوتوا من باب الخليل على جهة اليسار.