مسار وادي البيرة

المسار الدائري هو الاكثر شهرة، مستوى الصعوبة متوسط، مع طلعة قوية بالنهاية، فبننصح فيه للعائلات مع أطفال كبار أو لأهل حاملين اطفالهم على سلة ملائمة للمسارات. بيستغرق هذا المسار ٣-٤ ساعات تقريباً، حسب همتكم. من موقف السيارات بتبلشوا تمشوا من جانب محطة المعلومات لجهة الشرق، مع علامة المسار الاحمر، وبعد تقريباً ٢ كيلومتر بتوصلوا للوادي. من هناك بتطلعوا لجهة الشمال، بعكس اتجاه الوادي مع علامة المسار الازرق. رح توصلوا الشلال الكبير وفيه بركة، بتقدروا تعملوا استراحة اكل او قهوة بهالمحل، ومن بعدها بتكملوا الطريق. بتكملوا مشي لمسافة ٣٠٠ متر تقريبا، وبعدها بتوصلوا لمفترق مسارات. رح تمشوا لجهة الشمال وتطلعوا التلة بطلعو صعب نسبياً، لحد ما توصلوا اعلى التلة والي فيها مطل رائع للوادي. من هناك بتكملوا مع المسار الازرق وبعدها للمسار الاحمر (لجهة الجنوب) ومن هناك بتوصلوا موقف السيارات وهيك بتكونوا خلصتوا المسار.

من موقف السيارات بتبلشوا مشي باتجاه الشرق، مع المسار الأحمر بتوصلوا لصخرة كبيرة عليها علامة مسار خضراء باتجاه اليسار، والي بتاخذكوا للمطل على الوادي وهون ممكن تستريحوا شوي وتتمتعوا بالمنظر. بتكملوا المشي حوالين البساتين بدون ما تنزلوا للوادي. من المطل بتكملوا على المسار الأزرق، بعدين للأسود، وأخيرًا بترجعوا للأحمر حتى توصلوا لموقف السيارة.